Derge Kanjur - བཀའ་འགྱུར ༼སྡེ་དགེ་པར་ཕུད༽
Toh 127Folio 111Volume 55
Vol. 55F. 111aUT4CZ5369-I1KG9181-0000/side/221
དེ་བཞིན་མགོ་ཡི་ནད་རྣམས་ཀྱང་། །འཚོ་བའི་འཇིག་རྟེན་དག་ན་དེ་ལ་ནད་མི་འབྱུང་། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །མི་ཡི་འཇིག་རྟེན་ནད་རྣམས་མང་པོ་ཅི་ཡོད་པ། །ལུས་ཀྱི་ནད་དང་དེ་བཞིན་སེམས་ཀྱི་ནད་རྣམས་དང་། །དེ་ལ་ནད་ཀྱང་དེ་དག་རྟག་
ཏུ་ཡོང་མི་འབྱུང་། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །སེམས་ལ་ཀུན་ནས་ཉོན་མོངས་པ་ནི་གང་ཡོད་དང་། །ལུས་ལ་ཡང་ནི་ནད་ཀྱི་རྣམ་པ་གང་ཡོད་པ། །ཀུན་ནས་ཉོན་མོངས་མང་པོ་དེ་དག་དེ་ལ་མེད། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །བར་སྣང་
ནམ་མཁའ་དག་ལ་གོས་པ་མེད་པ་ལྟར། །རྣམ་པར་དག་ཅིང་རྒྱ་ཆེ་རབ་ཏུ་འོད་གསལ་ཏེ། །དེ་བཞིན་དེ་ཡི་སེམས་ཀྱང་རྣམ་པར་དག་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །ཟླ་བའི་འོད་དང་དེ་བཞིན་ཉི་མའི་འོད་རྣམས་ནི། །དག་ཅིང་གཟུང་དུ་མེད་ལ་རབ་
ཏུ་འོད་གསལ་བ། །དེ་བཞིན་དེ་ཡི་སེམས་ཀྱང་ཤིན་ཏུ་འོད་གསལ་འགྱུར། །ཇི་ལྟར་ཚོན་རྩི་ཐོགས་ནས་བར་སྣང་ནམ་མཁའ་ལ། །རྣམ་པ་མང་པོ་དུ་མའི་གཟུགས་རྣམས་བྲི་བར་དཀའ། །དེ་བཞིན་རྡུལ་བྲལ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ལ་རི་མོར་བྲི་བ་སླ་
མ་ཡིན། །རླུང་ནི་ཇི་ལྟར་ཕྱོགས་བཞི་དག་ནས་ལངས་པ་དང་། །ཐོགས་པ་མེད་པར་ཕྱོགས་རྣམས་ཀུན་ཏུ་འགྲོ་བར་འགྱུར། །དེ་ཡི་སེམས་ཀྱི་རྒྱུད་ཀྱང་རླུང་དང་འདྲར་འགྱུར་ཏེ། །དེ་ནི་འཇིག་རྟེན་དག་ན་ཐོགས་མེད་མ་ཆགས་འགྲོ། །རླུང་ལངས་པ་ནི་རྒྱ་མོས་གཟུང་དུ་རུང་ཡང་
སྲིད། །རླུང་ནི་ཞགས་པ་དག་གིས་བཅིང་བར་ནུས་གྱུར་ཀྱང་། །རྡུལ་དང་བྲལ་བ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ནི་རབ་ཏུ་ཤེས་པར་སླ་མ་ཡིན། །གཟུགས་བརྙན་དག་ནི་ཆུ་ཡི་ནང་དུ་གཟུང་བར་རུང་། །འབྲུ་མར་གང་བའི་སྣོད་དང་ཆུ་ཡི་ནང་དུ་འབྱུང་། །
དེ་བཞིན་རྡུལ་བྲལ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ནི་རབ་ཏུ་ཤེས་པར་སླ་མ་ཡིན། །སྤྲིན་ལས་འབྲུག་ཟེར་གློག་གི་འཁྲི་ཤིང་བྱུང་བ་དག །མི་དག་གི་ནི་ལག་པས་གཟུང་བར་ནུས་གྱུར་ཀྱང་། །རྡུལ་དང་བྲལ་བ་ཞི་བའི་ཏིང་འཛིན་འདི་ཐོབ་ན། །དེ་ཡི་
Vol. 55F. 111bUT4CZ5369-I1KG9181-0000/side/222
སེམས་ཀྱི་ཚད་ནི་ཤེས་པར་སླ་མ་ཡིན། །ཕྱོགས་བཅུའི་སངས་རྒྱས་ཞིང་ན་སེམས་ཅན་ཅི་ཡོད་པ། །སེམས་ཅན་དེ་དག་གི་ནི་སྒྲ་སྐད་གཟུང་ནུས་ཀྱང་། །བྱང་ཆུབ་སེམས་དཔའ་ནམ་ཞིག་ཏིང་འཛིན་འདི་ཐོབ་ན། །དེ་ཡི་སེམས་ཀྱི་མཐའ་ནི་ཤེས་པར་སླ་མ་ཡིན། །དེས་ནི་རྡུལ་
བྲལ་ཞི་བའི་ཏིང་འཛིན་འདི་ཐོབ་ནས། །ཀུན་ནས་ཉོན་མོངས་མེད་ཅིང་གོས་པ་མེད་པར་འགྱུར། །ནམ་ཞིག་དེས་ནི་ཏིང་འཛིན་ཞི་བ་ཐོབ་པའི་ཚེ། །ཕྱིར་ཡང་སྲེད་པ་གསུམ་ལ་ནམ་ཡང་ཆགས་མི་བྱེད། །ནམ་ཞིག་རྡུལ་དང་བྲལ་བའི་ཏིང་འཛིན་འདི་ཐོབ་ན། །འདོད་པ་དག་ལ་མི་སྲེད་
གཟུགས་ལ་མི་སྲེད་དེ། །བུད་མེད་དག་ལ་མི་སྲེད་སེམས་ཀྱང་འཁྲུལ་པ་མེད། །ཞི་ཞིང་རབ་ཏུ་ཞི་བ་གོས་པ་མེད་པར་འགྱུར། །ནམ་ཞིག་རྡུལ་དང་བྲལ་བའི་ཏིང་འཛིན་འདི་ཐོབ་ན། །བུ་ལ་མི་སྲེད་བུ་མོ་དག་ལའང་སྲེད་མི་འགྱུར། །ཆུང་མ་དག་ལའང་མི་སྲེད་གཡོག་ལའང་སྲེད་པ་མེད། །རབ་
ཏུ་ཞི་བར་སྤྱོད་ཅིང་གོས་པ་མེད་པར་འགྱུར། །གསེར་ལ་མི་སྲེད་ནོར་རྣམས་ལ་ཡང་སྲེད་མེད་དེ། །མཐོ་རིས་མི་སྲེད་རིན་ཆེན་རྫས་ལ་ཆགས་མི་འགྱུར། །སེམས་ཀྱང་ཤིན་ཏུ་རྣམ་པར་དག་ཅིང་མི་རྟོག་པ། །འདི་ནི་ཏིང་ངེ་འཛིན་རྣམས་ཐོབ་པའི་བྱེ་བྲག་ཡིན། །རྒྱལ་སྲིད་འདོད་ཕྱིར་
ཚངས་པར་སྤྱོད་པ་དེ་མི་སྤྱོད། །མཁས་པ་མཐོ་རིས་སྲེད་པས་རྟག་ཏུ་སྦྱིན་མི་བྱེད། །བྱང་ཆུབ་སེམས་དཔའ་བྱང་ཆུབ་འདོད་པས་སྦྱིན་བྱེད་དེ། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་གོ། །རྒྱལ་པོའི་སྲིད་ཕྱིར་དཀའ་ཐུབ་བརྟུལ་ཞུགས་མི་སྤྱོད་དོ། །སྲིད་པ་གསུམ་དུ་དབང་ཕྱུག་འདོད་
པའི་ཕྱིར་མ་ཡིན། །སྐྱེ་བོ་མང་ལ་ཕན་ཕྱིར་བྱང་ཆུབ་སྲེད་པ་ཡིས། །དེ་ནི་རྡུལ་དང་བྲལ་བའི་ཏིང་འཛིན་འདི་སྒྲུབ་བོ། །གླུ་ལ་མི་སྲེད་གར་ལའང་སྲེད་པ་མ་ཡིན་ཏེ། །སྤོས་ལ་མི་སྲེད་བཏུང་བ་དག་ལའང་སྲེད་མ་ཡིན། །ཟས་ལའང་མི་སྲེད་གོས་ལ་ཡང་ནི་སྲེད་མི་འགྱུར། །འདི་
ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །མིག་ལ་མི་སྲེད་རྣ་བ་ལ་ཡང་སྲེད་མ་ཡིན། །སྣ་ལ་མི་སྲེད་ལྕེ་ལ་སྲེད་པ་མ་ཡིན་ཞིང་། །ལུས་ལ་མི་སྲེད་སེམས་ལ་ཡང་ནི་སྲེད་མི་འགྱུར། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །ཁྱིམ་ལ་མི་སྲེད་དགོན་པར་སྲེད་པ་མ་ཡིན་