Derge Kanjur - བཀའ་འགྱུར ༼སྡེ་དགེ་པར་ཕུད༽
Toh 44-31Folio 126Volume 36
Vol. 36F. 126aUT4CZ5369-I1KG9162-0000/side/251
ཞིང་གི་རྒྱུད་ལ་རབ་ཏུ་ཞུགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་སུ་སངས་རྒྱས་ཀྱི་རིགས་སུ་བྱུང་བའི་བྱང་ཆུབ་སེམས་དཔའི་སྤྱོད་པའི་
རྒྱུད་ལ་གནས་ཤིང་རྣམ་པའི་ཚུལ་རྣམ་པ་ཐ་དད་པ་བརྗོད་དུ་མྱེད་པའི་ཡང་བརྗོད་དུ་མྱེད་པ་བསམ་གྱིས་མྱི་ཁྱབ་པའི་ལྷག་པའི་བསམ་པས་རྣམ་པར་ཕྱེ་བ་ཐོབ་སྟེ། ཚད་མྱེད་པའི་སྨོན་ལམ་ལ་ཡང་དག་པར་བརྩོན་ཞིང་ཆོས་ཀྱི་དབྱིངས་
ཐམས་ཅད་དང་། དུས་གསུམ་གྱི་ཆོས་ཀྱི་དབྱིངས་ཐམས་ཅད་དུ་རྒྱུན་མྱི་ཆད་པར་རབ་ཏུ་ཞུགས་པའི་སེམས་སུ་ཀུན་ཏུ་བཟང་པོའི་སྤྱོད་པའི་ཚུལ་ཤེས་པ་དང་། རབ་ཏུ་ཤེས་པ་དང་། རྗེས་སུ་རྟོགས་པའི་ཤེས་རབ་ཀྱི་
དབྱིངས་ལ་རབ་ཏུ་ཞུགས་པར་གྱུར་ཅིག །དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་སྒོས་རྣམ་པར་དག་པར་བྱས་པའི་མྱིག་གི་སྒོ་དང་ལྡན་ཞིང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་
སེམས་སུ་སྐྲ་ཡི་སྦུབས་རེ་རེ་ཞིང་བརྗོད་དུ་མྱེད་པའི་ཡང་བརྗོད་དུ་མྱེད་པའི་ཞིང་རྣམས་ཡང་དག་པར་འཛུད་པ་རབ་ཏུ་ཤེས་པར་གྱུར་ཅིག །དེ་བཞིན་དུ་ཆོས་ཀྱི་དབྱིངས་ཐམས་ཅད་ལ་འཇུག་པ་ཉེ་བར་བཟུང་སྟེ། ནམ་མཁའི་དབྱིངས་
ཀྱི་མཐར་ཐུག་པར་གྱུར་ཏེ། སྐྲའི་སྦུབས་གཅིག་ཏུ་ཇི་ལྟ་བ་བཞིན་དུ་ཆོས་ཀྱི་དབྱིངས་ཐམས་ཅད་ནམ་མཁའི་མཐས་གཏུགས་པའི་སྐྲ་ཡི་སྦུབས་ཐམས་ཅད་དུ་འཛུད་པ་ལ་རབ་ཏུ་མཁས་པར་གྱུར་ཅིག །ཤིན་ཏུ་ཤེས་པར་གྱུར་ཅིག་
མངོན་པར་རྟོགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་སུ་སེམས་ཀྱི་སྐད་ཅིག་གཅིག་ལ་བརྗོད་དུ་མྱེད་པའི་བསྐལ་པ་ལྷག་པའི་བསམ་པས་ཡང་དག་པར་སྟོན་པར་བྱེད་ཅིང་མཐའ་
Vol. 36F. 126bUT4CZ5369-I1KG9162-0000/side/252
དང་དབུས་མྱེད་པ་གཅིག་ནས་གཅིག་ཏུ་བརྒྱུད་པས་མཐོང་བར་གྱུར་ཅིག །རབ་ཏུ་ཞུགས་པར་གྱུར་ཅིག །དེ་བཞིན་དུ་སེམས་ཅན་གྱི་ཁམས་ཐམས་ཅད་མ་ལུས་པའི་སེམས་ཀྱི་སྐད་ཅིག་ལ་འཇུག་པའི་ཚུལ་དུ་ཚུལ་འདི་ཀུན་ཏུ་བཟང་པོ་
ལ་བརྩོན་པའི་ལྷག་པའི་བསམ་པས་ཡོངས་སུ་ཤེས་པར་གྱུར་ཅིག །རབ་ཏུ་རྟོགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་ཀྱིས་ལུས་རེ་རེར་ཡང་བརྗོད་དུ་མྱེད་པའི་ཡང་བརྗོད་
དུ་མྱེད་པའི་ལུས་ཡོངས་སུ་འཛུད་པ་མཐོང་བར་གྱུར་ཅིག །རབ་ཏུ་རྟོགས་པར་གྱུར་ཅིག །ལུས་གཅིག་ལ་ཇི་ལྟ་བ་དེ་བཞིན་དུ། ལུས་འབྱམ་ཀླས་པ་ལ་འཇུག་པ་ཐམས་ཅད་མ་ལུས་པར་ཉེ་བར་བཟུང་སྟེ། སེམས་
ཅན་གྱི་ཁམས་ཐམས་ཅད་མ་ཚང་བ་མྱེད་པ་དང་། ལྷག་པ་མྱེད་པར་ཤེས་པའི་སེམས་བསྐྱེད་པ་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པས་ཡོངས་སུ་
བསྔོས་པའི་ཚུལ་གྱིས་འདི་ལ་རབ་ཏུ་ཞུགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་། གྲོལ་ཞིང་བཅིངས་པ་མྱེད་པའི་སེམས་སུ་སངས་རྒྱས་ཐམས་ཅད་རྟོགས་པར་བྱ་བ་རབ་ཏུ་རྟོགས་ཤིང་། ནམ་མཁའི་དབྱིངས་
ཐམས་ཅད་དེ་བཞིན་གཤེགས་པའི་སྐུ་དང་བྲལ་བ་མྱེད་ཅིང་། མཚན་གྱིས་རྣམ་པར་འཕྲུལ་པའི་སྐུ་དང་དབྱངས་ཀྱི་ཡན་ལག་རབ་ཏུ་བགྱེ་བ་རྒྱུན་ཆད་པ་མྱེད་པས་སྣང་བར་མཛད་པས་གང་བ་རབ་ཏུ་ཆུད་པར་གྱུར་ཅིག །དེ་བཞིན་གཤེགས་
པས་གསུངས་པ་དེ་དག་ཀྱང་ཡང་དག་པར་འཛིན་པར་གྱུར་ཅིག །དེ་བཞིན་གཤེགས་པའི་སྐུ་དེ་དག་ཀྱང་། ཀུན་ཏུ་བཟང་པོའི་སྨོན་ལམ་ཡངས་པ་རྒྱ་ཆེན་པོ་དང་། འཇིག་རྟེན་ཐམས་ཅད་ཀྱི་འདུ་ཤེས་ཕྱིན་ཅི་ལོག་དང་།