Derge Kanjur - བཀའ་འགྱུར ༼སྡེ་དགེ་པར་ཕུད༽
Toh 46Folio 23Volume 39
Vol. 39F. 23aUT4CZ5369-I1KG9165-0000/side/45
ལྡན་དང་། །མང་དུ་ཐོས་པར་གྱུར་ནས་སུ། །དེ་ཚེ་སངས་རྒྱས་ས་སྟོན་པ་པོ། །བྱམས་པས་དེ་དག་ལུང་སྟོན་འགྱུར། །དེ་བས་དོན་འདི་ཐོས་གྱུར་ནས། །དད་པ་བཟང་པོ་སྐྱེད་པར་འགྱུར། །སེམས་ཅན་ཀུན་ལ་ཕན་གདགས་ཕྱིར། །སེམས་ནི་
བརྟན་པོར་བྱེད་པར་འགྱུར། །འདི་ནི་མི་གང་ཡོངས་ཚོལ་བ། །གནས་དེ་ཅི་ཕྱིར་རྙེད་མི་འགྱུར། །གང་ལ་ཤེས་རབ་བརྩོན་འགྲུས་ཡོད། །དེ་ལ་བྱང་ཆུབ་དཀོན་པ་མེད། །དགའ་ཞིང་མགུ་བའི་སེམས་ཀྱིས་ནི། །གཡོ་དང་ལྡན་པར་ཡོང་མི་བྱ། །བྱམས་པའི་
སེམས་ནི་བསྒོམ་པར་བྱ། །བས་མཐའ་དགོན་པར་གནས་པར་བྱ། །འདི་ནི་བྱང་ཆུབ་སྤྱོད་པ་ཡིན། །གང་དག་འདི་ལ་གསོག་ཆོས་ཀྱིས། །གནས་འདིར་རབ་ཏུ་རྗོད་བྱེད་པ། །དེ་དག་ཆོམ་རྐུན་དྲག་པོ་ཆེ། །སེམས་ཅན་ཀུན་གྱིས་ཕྱག་བྱས་སོ། །གང་དག་བཟའ་
དང་བཏུང་བ་དང་། །རྙེད་དང་བཀུར་སྟིའི་དོན་གྱི་ཕྱིར། །ཆོས་རྣམས་འཐུན་པར་བཟུང་བྱས་ནས། །ཕན་ཚུན་དུ་ནི་འཆད་པར་འགྱུར། །དེ་དག་སྲོག་ནི་མཆོག་མིན་ཏེ། །དེ་དག་སྲོག་ནི་དོན་མེད་དོ། །དེ་ནི་འཆི་ཞིང་ཕོངས་པར་འགྱུར། །དེས་ནི་ངན་སོང་མྱུར་དུ་འགྱུར། །ཆོས་
ཀྱི་སྒོ་ནས་ཁ་ཅིག་ནི། །དགེ་སློང་མིན་ལ་དགེ་སློང་མིང་། །སོ་སོར་ཐར་པ་ལེགས་གསུང་དང་། །མདོ་སྡེ་བསྔགས་མིན་བརྗོད་པར་འགྱུར། །གང་དུ་རང་ཁྲིམས་ཕུན་སུམ་ཚོགས། །འདི་འདྲ་བ་དག་ངས་བཤད་པ། །དགེ་སློང་གཟུགས་ཀྱིས་སྤོང་འགྱུར་ཏེ། །དེ་དག་ལ་ནི་བཟང་འགྲོ་
མེད། །གང་ཞིག་ལྷར་བཅས་འཇིག་རྟེན་ལ། །དེ་སྙེད་སྐུར་པ་བཏབ་པ་བས། །གང་གིས་ཀུན་མཁྱེན་སྟོན་པ་ལ། །སྐུར་བཏབ་དེ་ནི་དེ་བས་མང་། །ལུས་ཀྱིས་ཀུན་ཏུ་བསྡམ་པར་བྱ། །ངག་གིས་ཡང་དག་བསྡམ་པར་བྱ། །ཡིད་ཀྱིས་སྡང་བར་མི་བསམ་སྟེ། །དེ་ཚེ་མྱ་ངན་འདས་པར་
གྱིས། །འོད་སྲུང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཤིང་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པའི་དགེ་སློང་རྣམས་ཀྱང་ཡོངས་སུ་མྱ་ངན་ལས་འདས་ལ། ལྷག་པའི་བསམ་པ་ཕུན་སུམ་ཚོགས་པའི་སེམས་ཅན་རྣམས་ཀྱང་འཆི་བའི་དུས་བྱས་ཏེ་ཟད་པར་གྱུར་པ་འབྱུང་
Vol. 39F. 23bUT4CZ5369-I1KG9165-0000/side/46
བའི་དུས་དེ་ཡོད་དེ། དམ་པའི་ཆོས་ཕྱི་མ་ལོ་ལྔ་བརྒྱ་པ་ཐ་མར་གྱུར་པ་ན་དགེ་སློང་བརྐམ་པ། ཆགས་པས་ཟིལ་གྱིས་ནོན་པ། ཆགས་པ་ཡ་ང་བས་ཟིལ་གྱིས་ནོན་པ། ཕྲ་མ་ཅན། གཏུམ་པ། །བརླང་བ། རྩུབ་པ། ཁྲོ་གཉེར་མང་བ། །ཆོས་གསུམ་ལ་གནས་པ་དག་འབྱུང་སྟེ། གསུམ་
གང་ཞེ་ན། དམན་པའི་ཐ་སྙད་ལ་གནས་པ་དང་། ཉོ་ཚོང་གི་སྤྱོད་པ་ལ་གནས་པ་དང་། བུད་མེད་དང་འདྲེ་ཞིང་གནས་པ་སྟེ། ཆོས་གསུམ་པོ་དེ་དག་ལ་གནས་པར་འགྱུར་རོ། །ཆོས་བཞི་ལས་ཡོངས་སུ་ཉམས་པར་འགྱུར་ཏེ། བཞི་གང་ཞེ་ན། ཚུལ་ཁྲིམས་ཀྱི་ཕུང་པོ་ལས་ཡོངས་སུ་ཉམས་པར་
འགྱུར་བ་དང་། བཟང་འགྲོར་འགྲོ་བ་ལས་ཡོངས་སུ་ཉམས་པར་འགྱུར་བ་དང་། འབྲས་བུ་ཐོབ་པ་ལས་ཡོངས་སུ་ཉམས་པར་འགྱུར་བ་དང་། སངས་རྒྱས་ལ་ཡང་དག་པ་ཇི་ལྟ་བ་བཞིན་དུ་བལྟ་བ་ལས་ཡོངས་སུ་ཉམས་པར་འགྱུར་བའོ། །ཆོས་བཞི་པོ་དེ་དག་དང་ལྡན་པ་དེ་རྣམས་ལ་སྐྱོ་བར་
བྱེད་པའི་ཆོས་བཞི་ཤིན་ཏུ་ཤས་ཆེ་བར་འགྱུར་ཏེ། བཞི་གང་ཞེ་ན། དེ་དག་ལ་ཕྲག་དོག་ཤིན་ཏུ་ཤས་ཆེ་བར་འགྱུར་བ་དང་། དེ་དག་ལ་ཁྲོ་བ་ཤིན་ཏུ་ཤས་ཆེ་བར་འགྱུར་བ་དང་། དེ་དག་ལ་ཁྱིམ་ལ་ལྷག་པར་ཆགས་པ་ཤིན་ཏུ་ཤས་ཆེ་བར་འགྱུར་བ་དང་། བདག་ཀྱང་ཡོངས་སུ་སྤངས་ཏེ་བརྐམ་
པས་ཟས་སོགས་པའི་གནས་ཀྱི་བུམ་པར་འཇོག་པར་འགྱུར་ཏེ། དེ་དག་ཆོས་གོས་ལ་ཞེན་ནས་ཆགས་པས་ཟིལ་གྱིས་ནོན་ནས་ཟ་མ་ཏོག་ལྟ་བུའི་ཆོས་མང་དུ་ཀུན་ཏུ་སྤྱོད་པར་འགྱུར། ཟ་མ་ཏོག་ལྟ་བུའི་ཆོས་ཡང་དག་པར་བླངས་ནས་གནས་པར་འགྱུར། གསོག་དང་ཡ་མ་བརླར་
འགྱུར་ཏེ། དེ་དག་ལ་དགེ་སྦྱོང་གི་ཆོས་གནས་པར་མི་འགྱུར་རོ། །ཆོས་འདི་ལྟ་བུ་འདི་དག་ཐོས་ནས་གནས་བཞི་ལྷག་པར་ཡོངས་སུ་ཚོལ་བར་འགྱུར་ཏེ། བཞི་གང་ཞེ་ན། ཆོས་སྤོང་བ་ལྷག་པར་ཡོངས་སུ་ཚོལ་བར་འགྱུར་བ་དང་། མ་གནང་བ་སྨྲ་བར་འགྱུར་བ་དང་།
བུད་མེད་འབའ་ཞིག་འཁོད་པ་ལ་ཆོས་འཆད་པར་འགྱུར་བ་དང་། དེ་དག་དེ་ལྟ་བུ་བྱེད་ཅིང་སོ་སོར་ཐར་པ་སྤོང་བ་ལྷག་པར་ཡོངས་སུ་ཚོལ་བར་འགྱུར་བ་སྟེ། དེ་དག་མདོ་སྡེ་འདི་ལྟ་བུ་འདི་དག་ཐོས་ནས། དེ་བས་ཀྱང་ཆེར་ཆོས་ཀྱིས་ཕོངས་པར་འགྱུར་བའི་ལས་བྱེད་པར་