Derge Kanjur - བཀའ་འགྱུར ༼སྡེ་དགེ་པར་ཕུད༽
Toh 47Folio 97Volume 39
Vol. 39F. 97aUT4CZ5369-I1KG9165-0000/side/193
འདི་ལ་ནི་ལེགས་བསླབས་ནས། །རྟག་ཏུ་བག་དང་ལྡན་པར་གྱིས། །སྨོན་ལམ་དམ་པ་རྒྱ་ཆེ་ཞིང་། །གཙོ་བོར་རྟག་ཏུ་ཐོབ་གྱུར་ནས། །བྱང་ཆུབ་རྟོགས་པར་འདོད་ན་ཡང་། །ཆོས་འདི་དག་ལ་བསླབ་པར་གྱིས། །མདོ་འདི་ལས་ནི་ངེས་སྨོས་པ། །ཕྱག་རྒྱ་བླ་ན་མེད་
པ་སྟེ། །ཆོས་ཀུན་རྗོད་པར་བྱེད་པ་ཡི། །གཟུངས་སུའང་བཤད་པ་འདི་ཡིན་ནོ། །ཆོས་རྣམས་ཐམས་ཅད་གཟུངས་འདི་ཡི། །ནང་དུ་འདུས་པར་རབ་ཏུ་བཤད། །འདི་དག་ནམ་མཁའི་སྒོ་ཅན་ཏེ། །མཐའ་ཡས་དོན་དུ་ལེགས་པར་དེས། །ཆོས་འདི་དག་ལས་སྒོ་བསྟན་པ། །སྒོ་ནི་
ལེགས་པར་བརྗོད་པ་ཡིན། །མཁས་པ་ཀུན་ཏུ་གཟུང་བའི་ཕྱིར། །གཟུངས་ནི་ཉེ་བར་སྐྱེ་བར་འགྱུར། །ཤེས་རབ་ངེས་པར་བསྟན་པ་འདི། །ཆོས་ཀུན་འཛིན་པར་བྱེད་པ་སྟེ། །མཁས་པ་ཀུན་ཏུ་གཟུང་བའི་ཕྱིར། །ཤེས་རབ་ཉེ་བར་གཟུང་བར་བྱ། །རྣམ་གྲངས་འདིར་ནི་བསྟན་
པ་དག །སངས་རྒྱས་ཆོས་ཤེས་ཡང་དག་བྱ། །བྱང་ཆུབ་ཡན་ལག་བླ་ན་མེད། །དོན་གྱིས་ཡང་དག་བརྗོད་པ་ཡིན། །ཡེ་ཤེས་རབ་དབྱེ་མཁས་པ་ཡང་། །འདི་ལས་ཡང་དག་བསྟན་པ་ཡིན། །བྱང་ཆུབ་ཕྱོགས་དང་འཐུན་པའི་ཆོས། །བླ་མེད་འདི་ལ་བསླབ་པར་གྱིས། །བླ་མེད་
ཚུལ་ལ་མཁས་པ་ཡང་། །ཆོས་འདི་ལས་ནི་ངེས་པར་བསྟན། །ཐབས་ཤེས་པ་ལ་བརྟེན་ནས་ནི། །ཆོས་འདི་རབ་ཏུ་བསྟན་པར་གྱིས། །ཆོས་རྣམས་ཀྱི་ནི་རང་བཞིན་འདི། །ཉེ་བར་བསྟན་པ་བླ་ན་མེད། །འདི་ལ་བསླབས་ནས་བདུད་རྩི་ཡི། །དོན་འདི་ཡང་ནི་བཤད་པར་གྱིས། །
མཁས་པ་གང་ཞིག་སངས་རྒྱས་ཀྱི། །ཡེ་ཤེས་ཆགས་པ་མེད་འདོད་པ། །དེ་དག་དོན་འདི་ལ་བསླབས་ན། །ཡེ་ཤེས་བླ་མེད་ཐོབ་པར་འགྱུར། །ངས་ཀྱང་སྔོན་ཆད་ཆོས་འདི་ལ། །བསྐལ་པ་བྱེ་བ་ཚད་མེད་ཅིང་། །གྲངས་མེད་དག་ཏུ་བསླབས་ནས་ནི། །ཚུལ་འདི་ཞི་བར་གྱུར་པ་
ཡིན། །ངས་ནི་སྔོན་ཆད་སངས་རྒྱས་དག །སྟོང་ཕྲག་མང་པོ་མཉེས་པར་བྱས། །དེ་ཕྱིར་བླ་ན་མེད་པའི་ཆོས། །འདི་ཀུན་མཁྱེན་ཅིང་གཟིགས་པ་ཡིན། །ངས་ནི་ཁྱོད་དང་སེམས་ཅན་གྱི། །ཚད་གཟུང་མེད་ཅིང་མཐའ་ཡས་པའི། །དོན་ཆེན་བྱས་ཏེ་དེ་ལས་ནི། །གཟུངས་འདི་ཐོབ་པར་གྱུར་
Vol. 39F. 97bUT4CZ5369-I1KG9165-0000/side/194
པ་ཡིན། །མཁས་པ་གང་ཞིག་གཟུངས་ཀྱི་སྒོའི། །ཕྱག་རྒྱ་འདི་ལས་ཚིག་གཅིག་ཅིག །རྣམ་པར་བསྒོམས་ནའང་ཚུལ་འདི་ལ། །རབ་ཏུ་འཇུག་པར་འགྱུར་བ་ཡིན། །ང་ཡི་ཡེ་ཤེས་ཚད་མེད་ཅིང་། །མཐའ་ཡས་བླ་ན་མེད་པ་སྟེ། །ང་ཡི་ཡེ་ཤེས་ཕུང་པོ་དེས། །ཆོས་འདི་རབ་ཏུ་བཤད་པར་
མཛད། །ཤེས་རབ་ལྡན་པ་གང་ཞིག་ནི། །བྱང་ཆུབ་ཆེད་དུ་རྟོགས་འདོད་པ། །འཇིགས་མེད་དེ་ཡིས་དོན་ཚུལ་འདིར། །ཡང་དག་ཉིད་དུ་བརྩོན་པར་གྱིས། །མཁས་པ་གང་ཞིག་ཤེས་རབ་ཀྱི། །སྣང་བ་མང་པོ་འདོད་པ་དེས། །སངས་རྒྱས་བསྙེན་བཀུར་རབ་བྱས་ནས། །ཚུལ་འདི་དག་ལ་
བསླབ་པར་གྱིས། །ཆོས་ཀྱི་འཁོར་ལོ་བསྐོར་བ་དང་། །ཆོས་དུང་བུད་པར་འདོད་པ་གང་། །ཤེས་རབ་ལྡན་པ་དེ་ཡིས་ནི། །བསྟན་པ་འདི་ལ་བསླབ་པར་གྱིས། །མི་གང་འོད་ཟེར་མཐའ་ཡས་པ། །དགྱེ་བར་འདོད་ཅིང་སངས་རྒྱས་ཀྱི། ཆོས་དོན་གཉེར་བ་གང་ཡིན་དེས། །འདི་ལ་ཚུལ་བཞིན་
བསླབ་པར་གྱིས། །དམ་པ་གང་ཞིག་ལྷར་བཅས་པའི། །འཇིག་རྟེན་ཟིལ་གནོན་འདོད་པ་དེས། །ཆོས་ཀུན་རྣམ་པར་ངེས་པ་ཡི། །མདོ་འདི་ལ་ནི་བསླབ་པར་གྱིས། །ང་ཡི་ཡེ་ཤེས་གཞལ་དུ་མེད། །ཡེ་ཤེས་རྩོམ་པའང་ཚད་མེད་དེ། །སངས་རྒྱས་ཡེ་ཤེས་འདོད་པ་གང་། །དེ་ཡིས་འདི་ལ་
རྗེས་སུ་སློབས། །སངས་རྒྱས་ཡེ་ཤེས་སྤྲོས་མེད་ཅིང་། །ཡེ་ཤེས་དམ་པར་གྱུར་པའི་ཚུལ། །ཐམས་ཅད་རབ་ཏུ་སྟོན་འདོད་གང་། །དེ་ཡིས་དོན་འདི་བསླབ་པར་གྱིས། །གང་ཞིག་ཡེ་ཤེས་ཆགས་མེད་པ། །སྟོན་པ་རབ་ཏུ་འཆད་འདོད་པ། །དེ་དག་གིས་ནི་ཆོས་འདི་ལ། །བསླབས་ནས་བདུད་
རྩི་བསྟན་པར་གྱིས། །གང་ཞིག་གིས་ནི་འཇིག་རྟེན་ཁམས། །བྱེ་བྲག་ཚད་མེད་མཐའ་ཡས་པ། །སྣང་བར་བྱེད་པར་འདོད་པ་དེས། །བསྟན་པ་འདི་ལ་ཡང་དག་སློབས། །སྒོ་འདི་བླ་ན་མེད་པ་སྟེ། །ཆོས་ཀུན་རྣམ་པར་སྦྱོང་བ་ཡིན། །མདོ་འདི་ལས་ནི་ཆོས་ཀུན་གྱི། །རྣམ་པར་དག་པ་རབ་ཏུ་
བསྟན། །ཀུན་མཁྱེན་རྐང་གཉིས་མཆོག་གིས་ནི། །བླ་ན་མེད་པའི་མདོ་འདི་ལས། ཤིན་ཏུ་རྒྱས་པ་འདིར་བཤད་པ། །བྱང་ཆུབ་སེམས་དཔའ་རྣམས་ལ་བསྟན། །བཀོད་པ་མཐའ་ཡས་དེ་ལྟ་བས་ན་བྱང་ཆུབ་སེམས་དཔའ་རྣམས་ཀྱིས་སེམས་ཅན་རྣམས་ལ་ཕན་གདགས་པའི་ཆེད་དུ་